Eze 24 | NdeIBE | STEP | Ngomnyaka wesificamunye, ngenyanga yetshumi, ngosuku lwetshumi, ilizwi likaJehova lafika kimi lisithi:

Ezekiel 24

Imbiza yokupheka

1 Ngomnyaka wesificamunye, ngenyanga yetshumi, ngosuku lwetshumi, ilizwi likaJehova lafika kimi lisithi: 2 “Ndodana yomuntu, bhala usuku lolu, usuku lolu lona ngokwalo, ngoba iNkosi yaseBhabhiloni isivimbezele iJerusalema ngalo kanye lolusuku.

3 Tshela indlu le ehlamukayo umfanekiso uthi kubo: ‘Nanku okutshiwo nguJehova Wobukhosi: “ ‘Beka imbiza yokupheka eziko; ibeke phezulu uthele amanzi phakathi kwayo.

4 Beka phakathi kwayo amaqatha enyama, wonke amaqatha amahle – umlenze lesiphanga. Igcwalise ngamathambo amahle;

5 thatha okukhethiweyo emhlambini. Basela kakhulu ngezinkuni usenzela amathambo; ibilise upheke amathambo phakathi kwayo.

6 “ ‘Ngoba nanku okutshiwo nguJehova Wobukhosi: “ ‘Maye kulo idolobho lokuchithwa kwegazi, kuyo imbiza esithombile, ukuthomba kwayo okungayikuphela! Ikhuphe iqatha ngeqatha kungekho kuwaphosela inkatho.

7 “ ‘Ngakho igazi elachithwa lidolobho leli liphakathi kwalo: lalithululela edwaleni elize; kalilithululelanga phansi lapho umhlabathi owawungaligqibela khona.

8 Ukuze ngivuse intukuthelo njalo ngiphindisele, ngabeka igazi lelo phezu kwedwala elize, ukuze lingagqitshelwa.

9 “ ‘Ngakho nanku okutshiwo nguJehova Wobukhosi: “ ‘Maye kulo idolobho lokuchithwa kwegazi! Lami futhi, ngizakwenza ibonda lezinkuni eliphakemeyo.

10 Ngakho faka inkuni uphembe umlilo. Ipheke kuhle inyama, uhlanganisa leziyoliso; uyekele amathambo atshe.

11 Emva kwalokho beka imbiza engelalutho phezu kwamalahle ize itshise lethusi layo livuthe ukuze ukungcola kwayo kutshe kuphele lokuthomba kwayo kutshe kuphele.

12 Isiphuthise imizamo yonke; uqweqwe lokuthomba kwayo kalususwanga, loba langomlilo.

13 “ ‘Khathesi ukungcola kwakho yisigwebo. Ngoba ngizamile ukukuhlambulula kodwa ubungeke uhlanjululwe ekungcoleni kwakho, kawuyikuhlambuluka futhi ukukuthukuthelela kwami kuze kudede.

14 “ ‘Mina uJehova sengikhulumile. Isikhathi sokuba ngenze sesifikile. Kangiyikuzithiba; kangiyikuba lesihawu, kumbe ngiyekethise. Uzakwahlulelwa mayelana lokuziphatha kwakho kanye lezenzo zakho, kutsho uJehova Wobukhosi.’ ”

Ukufa KomkaHezekheli

15 Ilizwi likaJehova lafika kimi lisithi:

16 “Ndodana yomuntu, sekuseduze ukuthi ngokugalela okukodwa nje ngisuse kuwe intokozo yamehlo akho. Kodwa ungalili kumbe ukhale loba wehlise izinyembezi. 17 Bubula uthule; ungalileli abafileyo. Bophela iqhiye yakho lamanyathela akho ezinyaweni zakho; ungambozi ingxenye yaphansi yobuso bakho loba udle ukudla komkhuba wabalilayo.”

18 Ngakho ngakhuluma labantu ekuseni, umkami wafa kusihlwa. Ekuseni kwakusisa ngenza njengokulaywa kwami.

19 Abantu basebengibuza besithi, “Kawuyikusitshela na ukuthi izinto lezi zilani lathi?”

20 Ngakho mina ngathi kubo, “Ilizwi likaJehova lafika kimi lisithi: 21 Tshono endlini ka-Israyeli uthi, ‘Nanku okutshiwo nguJehova Wobukhosi: Sekuseduze ukuthi ngingcolise indlu yami engcwele – inqaba eliziqhenya ngayo, intokozo yamehlo enu, into eliyithanda kakhulu. Amadodana lamadodakazi eliwatshiyileyo azabulawa ngenkemba. 22 Njalo lizakwenza njengoba ngenzile. Kaliyikumboza ingxenye yaphansi yobuso benu loba lidle ukudla komkhuba wabalilayo. 23 Lizafaka amaqhiye enu emakhanda enu lamanyathela enu ezinyaweni zenu. Kaliyikulila kumbe likhale kodwa lizacikizeka ngenxa yezono zenu njalo libubule phakathi kwenu. 24 UHezekheli uzakuba yisibonakaliso kini; lizakwenza njengoba enzile. Nxa lokhu kusenzakala, lizakwazi ukuthi mina nginguJehova Wobukhosi.’

25 “Njalo wena, ndodana yomuntu, ngosuku engizasusa ngalo inqaba yabo, intokozo yabo lodumo, injabulo yamehlo abo, isifiso senhliziyo yabo, kanye lamadodana lamadodakazi abo futhi –

26 ngalolosuku isiphepheli yiso esizalandisa izindaba. 27 Ngalesosikhathi umlomo wakho uzavuleka; uzakhuluma laye njalo kawuyikuthula futhi. Ngakho uzakuba yisibonakaliso kubo, njalo bazakwazi ukuthi nginguJehova.”